चौतर्फी दवाब आए पछि एभरेष्ट इन्स्योरेन्सको शेयरमूल्य समायोजनमा पछि हट्यो नेप्से

Arthikbazar.com – नेपाल स्टक एक्सचेञ्जले एभरेष्ट इन्स्योरेन्सको शेयरमूल्यमा गरेको समायोजन फिर्ता लिएको छ ।

संस्थापक हकप्रदलाई साधारण शेयरको मूल्यमा समायोजन गरेको भन्दै चौतर्फी दवाब आए पछि नेप्सेले यस अघि गरेको निर्णय फिर्ता लिएको हो ।

योसँगै शेयर मूल्य समायोजन पछि भएका कारोबारहरु रद्ध भएका छन् । नेपाल स्टक एक्सचेञ्जले एभरेष्ट इन्स्योरेन्सको साधारण शेयरको मूल्यमा १०५ प्रतिशत संस्थापक हकप्रदलाई समायोजन गरेको थियो । नेपालको पूँजी बजारमा पहिलो पटक निष्काशन हुन लागेको सन्दर्भमा फरक किसिमको शेयरलाई अर्कै शेयरमा गरिएको समायोजन व्यवहारिक थिएन ।

यही विषयलाई केन्द्रमा राखेर चौतर्फी रुपमा मूल्य समायोजन फिर्ता लिन नेप्सेलाई दवाब परेको थियो । कम्पनी स्वयमका साथै लगानीकर्ताहरुको चर्को आलोचना र दवाब पछि शेयर मूल्य समायोजन भएको चौथो दिनमा नेप्से आफ्नो निर्णयबाट पछि हटेको हो ।

नेप्सेले मूल्य समायोजनको निर्णय फिर्ता लिएसँगै समायोजन हुनुभन्दा पहिलेको दिनको मूल्यमा शेयर कारोबार सुरु भएको थियो । त्यस पछिका कारोबारहरुमा कम्पनीको शेयरमूल्यमा भारी गिरावट आएको छ ।

१ हजार ५० रुपैंया प्रतिकित्ताको दरमा कारोबार खुले पछि १ हजार ७१ रुपैंयामा पहिलो कारोबार भएको एभरेष्टको शेयर अहिले ९ सय ४५ रुपैंयामा किनबेच भईरहेको छ ।

नेपाल स्टक एक्स्चेञ्ज भने मूल्य समायोजनबाट पछि हट्दा लगानीकर्ता शसंकित बनेका छन् । चाहेको बेलामा कुनै पनि किसिमको निर्णय गर्ने अनि बिरोध सुरु भए पछि तत्काल पछि हट्ने कृयाकलापले नेप्सेको कृयाकलापमा लगानीकर्ताहरुले शंका व्यक्त गरे।

‘गर्नु पर्ने के हो भन्ने नबुझी हचुवाको भरमा नेप्सेले निर्णय गर्ने गरेको प्रष्ट भयो । कम्तीमा फ्रण्टलाइन रेगुलेटरले गर्नु पर्ने निर्णय उचित हुनु पथ्र्यो, ताकि अहिले आफ्नै निर्णयबाट पछि हट्नु पर्ने अवस्था आउने थिएन ।

आगामी दिनमा पनि नेप्सेले गर्ने हरेक निर्णयमा सहजै प्रश्न खडा गर्ने ठाउ बनेको छ ।’ नेप्सेको निर्णयका कारण केही दिन लगानीकर्ता समस्यामा समेत परे । त्यति मात्र नभई मूल्य समायोजन पश्चात शेयर किन्नेहरु पनि नेप्सेको गलत निर्णयका कारण मारमा परेका छन् ।

मूल्य समायोजन होस् वा कुनै पनि विषयमा निर्णय गर्नु पहिले पर्याप्त गृहकार्य र छलफल गर्नु पर्ने अवस्थामा नेप्से पुगेको भान भएको छ ।

यसमा तपाइको मत